Mfahamu Victor Lindelof anayetarajiwa kutua Manchester United.

Baada ya kuvunja rekodi ya usajili wa pauni milioni 89 kwa kumnasa Paul Pogba kutoka Juventus, Manchester United wanataka tena ‘kuzama’ mfukoni na kutoa pauni milioni 38 kumnasa beki wa Benfica, Victor Lindelof.

Lindelof alikichezea kikosi cha Benfica dhidi ya Porto mwaka 2014, kabla ya kusugua benchi kwa muda na kuibuka baadaye kuziba mapengo ya majeruhi.

Urefu wake, kasi na kuusoma mchezo, hayo ndiyo mambo pekee yaliyomfanya awe mrithi wa majeruhi Luisao na Lisandro Lopez na kusifiwa na Kocha wa United, Jose Mourinho.

Beki huyo wa kati amekuwa na bahati ya kunyakua mataji, ambapo akiwa kikosi cha vijana cha Sweden walibeba taji la Mataifa ya Ulaya la vijana chini ya miaka 21 mwaka jana.

Mourinho ni shabiki namba moja wa Lindelof, ambaye pia ana uwezo wa kucheza beki wa kulia. Mshambuliaji Zlatan Ibrahimovic amehusishwa kumshawishi nyota mwenzake huyo wa Sweden kutua kwenye klabu hiyo ya mjini Manchester.

“Victor anafanya mambo makubwa, anacheza vizuri Benfica, ana majukumu kibao kwenye timu ya taifa kwa sasa, anakuwa vizuri,” alisema Ibrahimovic.

“Anafaa kabisa kucheza klabu kubwa. Ni uamuzi wake anataka klabu gani. Popote atakapochagua kutakuwa kuzuri kwake.

“Najua anatishia sokoni kwa sasa, hivyo mwache achague anapotaka kwenda mwenyewe, pale panapomfaa.”

Dau la pauni milioni 38 linaonekana kuwa kubwa kwa mchezaji huyo mwenye umri wa miaka 22, huku akiwa na mwaka mmoja pekee wa uzoefu, lakini kwa maelezo ya Ibrahimovic na staili yake ya uchezaji, ikifananishwa na Rio Ferdinand, haitashangaza kuona Mourinho ananasa saini yake.

ZeroDegree.