Watano Azam kuikosa Majimaji.

NYOTA watano wa Azam wanatarajia kuikosa Majimaji katika mchezo wa Ligi Kuu Tanzania Bara utakaochezwa wikiendi hii kwenye Uwanja wa Majimaji mjini Songea.

Azam wataingia wakiwa na kumbukumbu ya kutoka sare tasa na African Lyon katika mchezo uliochezwa wiki iliyopita kwenye Uwanja wa Uhuru, Dar es Salaam.

Akizungumza na waandishi wa habari jana, meneja wa kikosi hicho, Philipo Alando, alisema watawakosa wachezaji wao watano ambao ni majeruhi.

Alando alisema wachezaji hao wameondolewa katika kikosi kilichosafiri hadi Songea kwa ajili ya mchezo huo kutokana na kuwa majeruhi.

“Madaktari walimletea kocha orodha ya wachezaji watano majeruhi ambao wasingeweza kusafiri na timu wamebaki kambini chini ya jopo la matabibu,” alisema Alando.

Aliwataja wachezaji ambao ni majeruhi kuwa ni Daniel Amoah, Yahya Mudathir, Gadiel Michael, Ismail Gambo na Abdallah Heri.

ZeroDegree.