Mayanja ahofia kupoteza kibarua KMC

KOCHA wa timu ya Manispaa ya Kinondoni (KMC), raia wa Uganda, Jackson Mayanja, amesema mwenendo wa matokeo mabaya ya Ligi Kuu Tanzania Bara unaweza kumsababishia kupoteza ajira yake.

KMC ilianza ligi hiyo kwa kufungwa na Azam bao 1-0, kisha kuchapwa na Coastal Union mabao 2-0, kabla ya kupata ushindi wa bao 1-0 dhidi ya Namungo.

Timu hiyo iliendelea kupata matokeo yasiyoridhishwa, baada ya kupata sare ya bao 1-1 na Ndanda na baadaye suluhu dhidi ya JKT Tanzania.

Kwa mujibu wa taarifa ya Bingwa, Mayanga alisema hafurahishwi na matokeo wanayoyapata kwani si mazuri na kudai kuwa anaweza kupoteza ajira yake.

“Tumepata ushindi mmoja tu katika mechi tano tulizocheza na kupata alama nne kati ya 15 ambazo tulitakiwa kuzipata hili si jambo zuri hata kidogo.

“Kama matokeo yataendelea hivi yanaweza kuathiri ajira yangu sidhani kama viongozi wa KMC wataendelea kuwa na kocha asiye na uwezo wa kuipa timu ushindi,” alisema Mayanja.

KMC inashika nafasi ya 17 katika msimamo wa ligi hiyo kutokana na pointi nne, baada ya kucheza michezo mitano.