Hii ndio hatima ya Kichuya Simba SC

MTENDAJI Mkuu wa Simba, Senzo Mazingiza, amesema kuwa ni mapema kwa sasa kuanza kujadili hatma za wachezaji watakaomaliza mikataba yao mwishoni mwa msimu huu, ukiwa bado haujamalizika.

Baadhi ya wachezaji wa Simba ambao watamaliza mikataba yao mwishoni mwa msimu huu ni pamoja na winga Shiza Kichuya na beki wa kati, Yusuph Mlipili.

Kulingana na taarifa ya Gazeti la Championi, Senzo alisema kuwa amekuwa akisikia watu wakitaja majina ya wachezaji ambao watawaacha kutokana na mikataba yao kumalizika mwishoni mwa msimu huu huku wao wakiwa bado hawajaweka hadharani na wanasubiri ligi imalizike ndiyo watoe majina hayo.

“Simba bado hatujataja wachezaji tutakaowaacha kwa wale watakaomaliza mikataba yao mwishoni mwa msimu huu, pia kwa wale wanaomaliza mikataba yao mwezi wa sita nadhani tutawajulisha pia mwishoni mwa msimu.
“Nadhani halitakuwa jambo jema kwa mchezaji kabla ya msimu kumalizika asikie kuwa anaachwa, hatakuwa katika mawazo mema tena, hivyo sisi hatuwezi kufanya hivyo kwani tunasubiri mpaka ligi imalizike,” alisema kiongozi huyo.