Abdi Banda aingia mkataba na kampuni ya Umbro

Beki wa Baroka FC, Abdi Banda ameingia mkataba wa mwaka mmoja na kampuni ya vifaa vya michezo ya Umbro.

Kwa mujibu wa taarifa ya SaleJembe, Mtanzania Abdi Banda anaingia kwenye idadi ya wachezaji maarufu wanaodhaminiwa na Umbro na sasa ataachana na viatu alivyokuwa akivaa aina ya Adidas.

Juzi, Banda amerejea mazoezini baada ya kukaa nje kwa wiki mbili na ushee baada ya kuumia akiitumikia Taifa Stars dhidi ya Cape Verde.

Nyumbani Tanzania, Banda alianza kuonyesha cheche zake akiwa na Coastal Union kabla ya kutua Simba.