Matokeo ya mechi ya Kombe la Shirikisho kati ya Yanga na Prisons leo Tareh 22, April 2017

MABINGWA wa tetezi wa kombe la shirikisho (FA) Yanga, wametinga hatua ya nusu fainali ya michuano hiyo baada ya kuibuka na ushindi wa mabao 3-0 dhidi ya Tanzania Prisons.

Mchezo huo wa robo fainali umefanyika katika uwanja wa Taifa jijini Dar es Salaam, ambapo yanga sasa inaungana na mahasimu wao Simba, Azam na Mbao FC katika hatua inayofuata ambayo ni nusu fainali.

Yanga ilipata magoli yake kupitia kwa Amissi Tambwe aliyefunga dakika ya 16 ya mchezo, Obrey Chirwa akafunga bao la pili dakika ya 41 na kuifanya Yanga kwenda mapumziko ikiwa mbele kwa mabao 2-0.

Simon Msuva aliifungia Yanga bao la tatu dakika ya 46 ya mchezo huo uliokuwa mkali kwa pande zote licha ya kuharibiwa na hali ya uwanja kutokana na mvua iliyokuwa ikinyesha.

Prisons nusura wapate bao la kufutia machozi baada ya kupata penalti dakika ya 54 lakini mpigaji Victor Hangaya aligongesha mwamba.

Baada ya ushindi huo, Yanga inakamilisha timu nne za nusu fainali, droo ya hatua hiyo itafanyika kesho ilikujua timu gani zitakutana kwenye michezo ya nusu fainali.