Yanga SC, Mbaraka Yusuf wa Kagera Sugar nini kinaendelea?

USAJILI wa Straika wa Kagera Sugar, Mbaraka Yusuf anayetajwa anayeaniwa vikali na Yanga sasa umefikia patamu lakini cha muhimu ni Wanajangwani hao kukubaliana na masharti ya mchezaji mwenyewe.

Mbaraka ambaye ni chaguo la kwanza kwa klabu hiyo ya Jangwani katika usajili wao mpya, msimu uliopita aliibuka kuwa mpachika mabao tishio kwa kutupia nyavuni mabao 12.

Mkali huyo alisema amepokea kwa mikono miwili ofa aliyopewa na Yanga na kwamba yupo tayari kukipiga katika klabu hiyo lakini kinachogomba kwa sasa ni aina ya mkataba.

Alifafanua kwamba, ofa aliyoipata katika klabu hiyo inamtaka kusaini mkataba wa miaka miwili lakini yeye anataka asaini mwaka mmoja wenye thamani ya sh.Milioni 20 ili aichezee kwa msimu mmoja na baadaye apate nafasi ya kucheza soka nje ya nchi.

Kutokana na mkanganyiko huo, mshambuliaji huyo chipukizi alisema bado yupo katika mazungumzo na watakapofikia makubaliano hatokuwa na ajizi, bali atamwaga wino na wenyewe Yanga watakubali muziki wake.

Mbaraka ni miongoni mwa wachezaji wapya waliomo katika ripoti ya kocha Mkuu wa Yanga, George Lwandamina ambapo klabu hiyo imemtengea donge nono la shillingi Mil 40 kwa mkataba wa miaka miwili endapo ataafiki kujiunga na timu hiyo.