Kauli ya Banda yawachefua mashabiki wa Simba

Mashabiki wa klabu ya Simba wamemvaa kwa kumshambulia na matusi makali mchezaji anayekipiga Baroka FC ya Afrika Kusini, Abdi Banda, kwenye akaunti yake ya Instagram.

Banda ambaye anatumia jina la 'Officialabdibanda24' Instagram, ametukanwa matusi ya kila aina kufuatia kauli yake juu ya Afisa Habari wa Simba kuwa aliwahi kuitisha kikao na Waandishi wa Habari kulalamikia penati.

Banda ambaye aliwahi kuichezea Simba, alinukuliwa akitamka kauli hiyo wakati akifanyiwa mahojiano na Mwandishi na Mhariri Mkuu wa Gazeti la Championi kupitia Global TV, Saleh Ally.

Kitendo cha kutoa kauli hiyo kimewafanya mashabiki wengi wa Simba kuanza kumshambulia kwa matusi makali baada ya Manara kutangaza kusikitishwa na kauli ya Banda, mapema leo asubuhi.

Wengi wamemtuhumu wakiandika ni mapema mno kutoa kauli kama hiyo kwasababu ndiyo kwanza ameanza safari ya maisha ya soka nje ya Tanzania.

Wapo pia walioandika wakimuonya asijaribu kutoa kauli kama hizo kwa viongozi waliomsaidia kufika hapo alipo na badala yake ajitume na kupambana zaidi ili afike mbali kisoka.

Manara aliandika kupitia Instagram akieleza kushangazwa na kauli ya Banda huku akisema ni wajibu wake kuongelea kila linalojiri ndani ya Simba, sababu ni wajibu wake kufanya hivyo.