Ryan Giggs ataja mchezaji anayekaribia kiwango cha Messi na Ronaldo

Gareth Bale anakaribia kuwa na kiwango sawa na mchezaji mwenzake wa Real Madrid, Cristiano Ronaldo pamoja na Lionel Messi wa Barcelona, kwa mujibu wa meneja wa timu ya taifa ya Wales, Ryan Giggs.

Bale amerejea Santiago Bernabeu wiki hii akitoka kuitumikia timu yake ya taifa ya Wales nchini China. Mshambuliaji huyo alifunga 'hat-trick' wakati timu yake ilipoibuka na ushindi wa goli 6-0 dhidi ya China wiki iliyopita kwenye michuano ya China Cup.

Nyota huyo mwenye umri wa miaka 28 amekuwa akihusishwa na kuondoka Real Madrid, lakini Giggs ana imani mchezaji wake anafurahia kuwa Bernabeu.

"Yuko katika klabu bora, ameshinda mataji matatu, hivyo anafurahia kuwa pale alipo," aliandika kwenye makala ya Sky Sports.

"Ukiwa kama mchezaji, siku zote unapigania nafasi yako na hakuna jingine hasa katika klabu ambayo ina wachezaji wazuri zaidi ya 11. Lakini bila kuhofia kitu chochote, Gareth anazidi kukwea juu na ana uwezo wa kuichezea timu yoyote duniani.

"Ni miongoni mwa wachezaji wakubwa duniani. Kuna Lionel Messi na Cristiano Ronaldo na kisha wapo wengine wazuri, ambapo yeye yuko juu ya waliosalia.''