Messi anataka Neymar arudi Barcelona

Lionel Messi, Neymar Jr na Luis Suarez, Barcelona

Kwa mujibu wa taarifa ya Don Balon, Lionel Messi anataka Neymar arejee Barcelona. Neymar alijiunga na Barcelona akitokea klabu yake ya tangu utoto Santos mwaka 2013 na kwa haraka akawa mchezaji tegemezi katika timu. Baada ya Luis Suarez kujiunga na klabu hiyo mwaka 2014, Messi, Neymar na Suarez waliunda utatu uliotikisa katika historia ya soka na ulipewa jina la utani MSN.

Ndani ya misimu mitatu kuanzia 2014 hadi 2017, Barcelona walifunga magoli 520 katika michuano yote na MSN walifunga asilimia 70% ya magoli hayo, 364. Neymar aliisaidia Barcelona kushinda mataji 8 katika kipindi chake chote kwenye klabu hiyo, ikiwa ni pamoja na kwenye Ligi ya Mabingwa (UEFA), La Liga na Kombe la Dunia la vilabu.

Neymar Jr, PSG

Kwa ujumla, Neymar aliichezea Barcelona michezo 186 katika michuano yote, akifunga magoli 105 na kutoa 'assist' 76. Aliondoka Barcelona kwenda PSG mwaka 2017 kwa ada ya uhamisho ya pauni milioni 200 iliyovunja rekodi ya dunia.

Hadi hivi sasa, Mbrazil huyo amekuwa na kiwango kizuri akiwa PSG msimu huu. Amecheza mechi 16 katika michuano yote, akifunga magoli 13 na kutoa 'assist' 6.

Imeripotiwa kwamba, kiwango cha Neymar cha sasa kimewapelekea Messi na Suarez kumtaka nyota huyo arudi Nou Camo na kufufua MSN.

Kwa sasa Barcelona ni vinara kwenye msimamo wa La Liga lakini hawajaonyesha kiwango cha kutisha sana kama ambavyo wengi walitarajia kuwaona msimu huu. Barca ilichapwa goli 4-3 na Betis jana. Hii ilikuwa mechi yao ya kwanza kupoteza dhidi ya Betis wakiwa nyumbani tangu mwaka 2005. Huku hatima ya Ousmane Dembele katika klabu hiyo ikiwa shakani, Messi na Suarez wanataka Barcelona imrejesheNeymar.