Samir Nasri kurejea EPL, safari hii ni katika klabu hii

Samir Nasri

Inaripotiwa kuwa kiungo mshambuliaji, Samir Nasri Nasri ambaye sasa yuko huru baada ya kusitisha mkataba wake na Anatalyaspor ya Uturuki, anafanya vipimo vya afya kujiunga na klabu ya West Ham United ya nchini Uingereza.

Mshambuliaji huyo wa zamani wa Arsenal kwa sasa anatumikia adhabu baada ya kusimamishwa kwa miezi 18 kwa kukiuka kanuni za Shirikisho la Kupambana na matumizi ya dawa zilizopigwa marufuku michezoni.

Kwa mujibu wa ripoti mbalimbali nchini Uingereza, mchezaji huyo wa zamani wa Marseille ya nchini Ufaransa anafanya vipimo vya afya kwenye klabu hiyo ya mjini London.

Samir Nasri mwenye umri wa miaka 31 atakuwa akikunja mfukoni kiasi cha £ 80,000 kwa wiki kama atasaini mkataba katika klabu hiyo.

Ukiachana na West Ham, pia mchezaji huyo anawindwa na Everton. Endapo Nasri atasaini mkataba katika klabu hiyo, ataruhusiwa kucheza kuanzia Januari Mosi mwaka ujao.

Kuwasili kwa Nasri katika klabu hiyo kunakuja wiki chache baada ya mchezaji, Andriy Yarmolenko aliyesajiliwa katika majira ya joto kuwa nje kwa miezi sita kutokana na kupata majeraha, majeraha ambayo aliyapata katika kichapo cha 1-0 kutoka kwa Tottenham mwezi uliopita.

Nasri, endapo atakamilisha dili la kujiunga na West Ham itashuhudia akiungana na kocha, Manuel Pellegrini, ambaye alicheza chini yake miaka mitano iliyopita katika klabu ya Manchester City.