Magufuli amtaka RC wa Dar es Salaam abadilike

Kushoto ni Mkuu wa mkoa wa Dar es Salaam Aboubakar Kunenge na kulia ni Rais wa Jamhuri ya Muungano wa Tanzania, Dkt John Magufuli.

Rais wa Jamhuri ya Muungano wa Tanzania Dkt John Magufuli, amemtaka Mkuu wa Mkoa wa Dar es Salaam, Aboubakar Kunenge, abadilike na kuachana na upole badala yake awe mkali kwa lengo la kuhakikisha miradi ya jiji hilo inaenda vizuri.

Rais Magufuli ametoa kauli hiyo hii leo Oktoba 8, 2020, jijini Dar es Salaam, wakati akizungumza na wakazi wa jiji hilo kwenye zoezi la kuweka jiwe la msingi katika mradi wa ujenzi wa kituo kipya cha mabasi yaendayo mikoani na nchi jirani kilichopo maeneo ya Mbezi Louis ambacho ujenzi wake umekamilika kwa 85%.

"Wahandisi wa mikoa na wilaya hamieni hapa msimamie huu mradi kwa hiyo uongozi wa mkoa, ninajua mkuu wa mkoa wewe ni mgeni hapa lakini badilika uwe mkali usiwe sheikh au Askofu, ni lazima watu watimize wajibu wao, muondoa 'damage' ambayo iko kwenye mkataba", amesema Rais Magufuli.

Katika hatua nyingine, Rais Magufuli ametoa maagizo kwa mkurugenzi wa jiji la Dar es Salaaam Spora Liana, kuhakikisha mradi wa ujenzi wa stendi hiyo unakamilika, kabla ya mwezi Novemba huku akiagiza mkandarasi wa mradi huo kuanza kukatwa pesa zake kwa sababu amechelewesha mradi huo.

"Mkurugenzi wa Jiji wewe ndiyo ulisaini mkataba huu, nataka kabla ya mwezi wa 11 mradi huu uwe umemalizika, wafanye kazi usiku na mchana umeme upo, maji yapo, fedha zipo hakuna sababu ya kusingizia Corona mbona hawajavaa barakoa hapa", ameongeza rais Magufuli.