Yajue mashindano makubwa matano ya soka duniani

Kandanda ndio mchezo maarufu zaidi ulimwenguni, na moja ya sababu za hilo ni idadi kubwa ya mashindano ya kusisimua na yenye mashabiki wengi ambayo hufanyika kila mwaka.

Iwe ni ndani ya nchi, bara, au kimataifa, karibu kila siku kuna mechi za mashindano ya kandanda kwa wachezaji na wapenda soka.

Kuanzia Ligi ya Mabingwa hadi Kombe la Dunia, kandanda ina mashindano ya kipekee na ya kuvutia katika ulimwengu wa michezo.

Katika makala hii, mtandao wa michezo kutoka Uingereza, talksport – umetoa orodha ya mashindano matano makubwa ya mpira wa miguu. 

Tukianzia namba tano:

5. Copa Libertadores

Kombe la Copa Libertadores ndiyo mashindano makubwa ya kandanda ya vilabu vya Amerika Kusini. Mashindano hayo huandaliwa kila mwaka na CONMEBOL na hushirikisha timu 47.

Michuano hiyo huanza mwezi Februari, na fainali itafanyika katika uwanja tofauti kila mwaka hufanyika mwezi Novemba.

Tangu kuanzishwa kwa shindano hilo mwaka 1960. Klabu ya Independiente ya Argentina ndiyo timu iliyofanikiwa kubeba ubingwa mara nyingi katika historia ya mashindano hayo, ikiwa imeshinda mara saba.

4. Copa America

Timu ya Argentina ndio imeshinda Copa America 2024

Copa America pia ni mashindano ya mpira wa miguu huko Amerika Kusini. Yalianzishwa mwaka 1916, Copa America ndio mashindano ya zamani zaidi ya mpira wa miguu ulimwenguni.

Kwa aina ya vipaji vinavyoonyeshwa katika mashindano hayo, Copa America ni mojawapo ya mashindano ya soka yaliyotazamwa zaidi duniani.

Jumla ya mataifa 19 hucheza michuano hiyo huku Mexico na Marekani zinazotokea sehemu ya kaskazini ya mataifa ya CONMEBOL, zikishiriki pia.

Baadhi ya wachezaji wakubwa wamecheza kwenye Copa America wakiwemo Lionel Messi, Neymar, Pele, na Diego Maradonna. Argentina ndio wanashikilia taji la Copa America kwa sasa baada ya kulitwaa hivi karibuni 2024.

Uruguay ndilo taifa lililofanikiwa zaidi katika michuano hiyo kwa kushinda mara 15. Michuano ya Copa America pia inaalika mataifa kutoka CONCACAF (Asia) kushiriki michuano hiyo. Michuano hiyo imeshirikisha timu za Japan na Qatar. Vilevile Australia na China zimekuwa miongoni mwa waalikwa.

3. Ligi ya Mabingwa Ulaya

Beki Mhispania wa Real Madrid, Nacho Fernandez akinyanyua kombe kusherehekea ushindi wao WA fainali ya UEFA Champions League Juni 1, 2024

Ligi ya Mabingwa ni mashindano makubwa ya vilabu katika kandanda la Ulaya. Ni michuano ya kila mwaka yanayozikutanisha timu bora kutoka ligi za Ulaya. Idadi ya timu kutoka kila nchi inatofautiana kulingana na nafasi ya ligi kwa mujibu wa viwango vya UEFA.

Ligi Kuu ya Uingereza, ndio ambayo mara nyingi huingiza timu nyingi, timu nne zikiingia kila mwaka. Katika mashindano ya 2024/25, vilabu vya Arsenal, Manchester City, Liverpool, na Aston Villa vitacheza.

Michezo ya mashindano hayo huchezwa katikati ya wiki. Hatua ya makundi huanza mwezi Septemba, na hatua ya mtoano huanza mwezi Februari na fainali hufanyika mwezi Mei.

Real Madrid ndio klabu iliyofanikiwa zaidi katika historia ya mashindano hayo, na kushinda mara 14. Liverpool ndio klabu iliyofanikiwa zaidi ya Uingereza kwa kushinda mara sita.

2. Michuano ya EURO

Uhispania ikisherehekea ushindi baada ya kuifunga England katika Euro 2024

Hii huchezwa kila baada ya miaka minne, mwaka huu mashindano hayo yanayozikutanisha timu za mataifa ya Ulaya (Euro) yamefanyika nchini Ujerumani na Spain imeibuka mshindi.

Euro hukusanya baadhi ya wachezaji bora kote Ulaya. Mashindano hayo huwa na watazamaji wengi. Mashindano ya kwanza ya kimataifa ya Ulaya yalifanyika mwaka 1960 huko Ufaransa.

Mashindano kumi na saba yamefanyik. Uhispania wameshinda mataji manne, Ujerumani wameshinda mataji matatu, Italia na Ufaransa wameshinda mataji mawili, na Umoja wa Kisovieti, Czechoslovakia, Uholanzi, Denmark, Ugiriki na Ureno wameshinda taji moja kila moja.

Mnamo 2014, mashindano yalipanuka kutoka timu 16 hadi 24, lakini kupanuka huko hakukupunguza kushuka kwa ubora wa mashindano hayo.

1. Kombe La Dunia

Nahodha wa timu ya taifa ya Argentina, Lionel Messi akinyenyua taji la kombe la dunia 2022

Kombe la Dunia la FIFA linaendelea kuwa shindano namba moja na kubwa zaidi katika kandanda ulimwenguni kwa sasa. Hukutanisha wanasoka bora kutoka kote ulimwenguni.

Baadhi ya wanasoka bora duniani wamecheza, wakiwemo Zinedine Zidane, Cristiano Ronaldo, Rivaldo, Diego Maradonna, na Pele. Kombe la Dunia la FIFA linaendelea kuwa mashindano ya kandanda yanayotazamwa zaidi na kufuatiliwa zaidi.

Yalifanyika kwa mara ya kwanza 1930, huko Uruguay na hufanyika kila baada ya miaka minne isipokuwa 1942 na 1946 kwa sababu ya Vita ya Pili vya Dunia.

Argentina waliibuka kuwa mabingwa wa Kombe la Dunia 2022 kwa mara ya tatu baada ya kuishinda Ufaransa kwa mikwaju ya penalti katika fainali ya mwisho iliyofanyika Qatar.

Cc: BBC