David Moyes ajutia kitendo chake cha kumtishia kumpiga kofi ripota wa kike wa kituo cha BBC

Kocha wa klabu ya Sunderland, David Moyes amesema kuwa anajutia sana kitendo cha kumtishia kumpiga kofi Ripota wa kituo cha BBC mwanadada Vicki Sparks.

Baada ya mechi kumalizika dhidi ya Burnley Machi 18, Moyes aliulizwa na Vicki Sparks kama uwepo wa mmiliki wa klabu hiyo Ellis Short jukwaani umemuongezea Pressure zaidi.

Moyes alijibu “Hapana”.Lakini baada ya mahojiano, kocha huyo alimwambia Sparks “Ingewezekana kupigwa kofi hata kama wewe ni mwanamke” na kumtaarifu awe “Makini” wakati ujao atakapokuja.

Akiongea katika mkutano na waandishi wa habari Moyes amekiri kujutia kitendo hicho, “Nimekubali kosa. Nimeongea na Ripota wa BBC, ambaye amekubali msamaha wangu”.

BBC wamethibitisha kuwa Moyes na Sparks tayari wameongea na wamemaliza issue hiyo.

Hata hivyo waziri kivuli wa michezo wa Uingereza Rozena Allin-Khana amekitaka chama cha soka cha England FA kuingilia kati suala hilo. “Huu ni uzalilishaji, David Moyes hawezi kuepuka suala hili la vitisho vya kijinsia. FA lazima wachukue hatua mara moja”. Aliandika Waziri huyo katika akaunti yake ya Twita.

Hata hivyo imeripotiwa kuwa chama cha soka cha England FA kitamuuliza kocha huyo kutoa maelezo zaidi juu ya tukio hilo.