Nape ashauri kubadilishwa mfumo wa malipo ya korosho

Mbunge wa Mtama (CCM), Nape Nnauye ameshauri kubadilishwa kwa mfumo wa malipo ya korosho kwa kuviwezesha vyama vya ushirika kupitia Benki ya Maendeleo ya Kilimo (TADB) ili kukabiliana na uuzwaji holela wa zao hilo maarufu kama Kangomba.

Ushauri wa Nape umekuja wakati Waziri wa Kilimo, Japheth Hasunga akitoa taarifa jana mkoani Mtwara kuwa hadi siku hiyo Serikali ilikuwa imewalipa wakulima 82,835 kiasi cha Sh83 bilioni katika mikoa ya Lindi, Mtwara na Ruvuma. 

Nape aliyekuwa mstari wa mbele miongoni mwa wabunge wa mikoa ya Kusini kupigania zao la korosho bungeni, ameandika katika ukurasa wake wa Twitter leo Jumanne Desemba 11, 2018 akisema kinachoendelea sasa ni kuwatesa wakulima.

Alipotafutwa na Mwananchi Nape alikiri kuwa ujumbe huo ni wake.

Katika ujumbe huo amesema, "Dawa ya Kangomba ni kubadili mfumo wa malipo ya Korosho kwa wakulima kwa kuviwezesha vyama vya ushirika kupitia TADB kulipa sehemu ya malipo mara tu korosho inapofika ghalani."

"Hichi kinachoendelea sasa hakiwezi kumaliza kangomba, ni mateso tu kwa wakulima."

Tangu Serikali ilipotangaza kununua korosho za wakulima kumekuwa na malalamiko ya kucheleweshwa kwa malipo, huku wengine wakihofu kuchelewa kutayarisha mashamba kwa msimu ujao.

Serikali imewataka wauza korosho kuonyesha mashamba yao kabla ya kulipwa ikiwa ni sehemu ya uhakiki, jambo linaloibua sintofahamu.