Xavi ana uwezo wa kuinoa Barcelona - Samuel Eto'o

Aliyekuwa mshambuliaji wa klabu ya Barcelona, Samuel Eto’o amemwagia sifa Xavi akisema kuwa anafaa kuchukua nafasi ya kukinoa kikosi cha wababe hao wa Nou Camp katika siku zijazo.

Xavi, ambaye alifikia hatua ya kuwa shujaa tegemezi katika kikosi Barcelona, alicheza na kutwaa mataji kadhaa akiwa na Eto’o. Mhisipania huyo tayari ameanza kazi ya umeneja akiwa na klabu ya Al Sadd ya Qatar.

“Kwa sasa ni meneja nchini Qatar na Uhispania,” alisema Eto’o akimzungumzia Xavi.

“Kama hatainoa Barca huko mbeleni, nitamuua!”

Samuel Eto'o na Xavi Hernandez kwenye fainali ya Ligi ya mabingwa 2006, Paris

“Kwenye fainali ya Ligi ya mabingwa 2006 mjini Paris alicheza kama [Diego] Maradona, [Lionel] Messi na Cristiano [Ronaldo] ukiwaunganisha wote kwa pamoja,” Eto’o aliongeza.

“Nimeshasema katika mahojiano yangu ya awali: yeye ni mchezaji bora niliyewahi kucheza naye pamoja.”

“Watu walishangazwa nilipoacha kuwataja Ronaldinho au Messi, lakini muda unaonyesha usahihi.”

“Hajawahi kulinganishwa na uwezo wa Leo au Cristiano, lakini Xavi na Iniesta wako katika kiwango hicho.”

Eto’o pia hakuacha kumsifia chipukizi wa klabu hiyo Ansumane Fati, ambaye ameonyesha uwezo mkubwa pale Nou Camp msimu huu.

Ansu Fati, 16

“Mungu pekee ndio anajua kipi kitatokea kwa Fati baadae. Ni mchezaji mzuri sana,” alisema mshambuliaji huyo wa zamani wa timu ya taifa ya Cameroon.