Joe Biden awataka raia wake kuvaa barakoa kwa siku 100

Rais mteule wa Marekani Joe Biden amesema anapanga kutoa agizo litakalowalazimu raia wa taifa hilo kuvaa barakoa katika majengo ya serikali na vituo vya kusafiri kwenda mataifa mengine, katika siku 100 za kwanza za utawala wake.

Biden amesema kwenye mahojiano na kituo cha utangazaji cha CNN kwamba atawaomba raia kuvaa barakoa kwa siku hizo 100 na si muda wote na anaamini watashuhudia kupungua kwa kiasi kikubwa maambukizi mapya.

Baada ya likizo ya sikukuu ya shukurani wiki iliyopita, kumeongezeka maambukizi mapya na vifo vitokanavyo na virusi vya corona, wakati jana kukiripotiwa zaidi ya visa vipya 210,000 na vifo 2,907. Aidha, kwenye mahojiano hayo Biden amesema atapendelea mtaalamu mwandamizi wa magonjwa ya kuambukiza Dr. Anthony Fauci kubakia kama mkuu wa taasisi ya kitaifa ya magonjwa ya kuambikiza na ya mzio.