Rooney afanya kufuru ndani ya Casino

JUU ya ardhi ya dunia hii hii tuliyomo, Wayne Rooney anatumbua bilioni 1.4 kwa saa mbili tu!

Yaani; pauni 500,000 ambazo ukizichenji kwa fedha ya Tanzania unapata bilioni 1,424, 870,000, ni kiasi kidogo ambacho Rooney anaweza kukitumia kwenye kamari tu, tena kwa saa mbili ambazo binadamu wengine hutumia kupumzika baada ya siku nzima ya mihangaiko, wakiwa hawapati usingizi kwa mawazo ya kesho yao itakuwaje.

Umeiona ile milioni 400 na ushee ndani ya bilioni moja aliyotumia Rooney kwa saa mbili? Zile ni fedha ambazo Simon Msuva wa Yanga anazikusanya kwa miaka 80! Yaani mshahara wa milioni tano anaoupokea kila mwezi pale Jangwani, itabidi audundulize kwa miaka yote hiyo ili afikie kiasi ambacho Rooney anakitumia kwa anasa ya saa mbili tu.

Ishu yenyewe iko hivi; mtandao wa Daily Mail kwa kushirikiana na The Sun ulitoa ripoti kuwa miezi miwili iliyopita nahodha huyo wa Manchester United, aliwahi kupoteza pauni 500,000 kwenye kamari ndani ya saa mbili tu.

Wazoefu wa michezo ya kamari walinukuliwa wakisema hicho ni kiasi kikubwa cha fedha kupotea katika mchezo wa kamari, huku watu wa karibu na Rooney wakidai kwamba fedha aliyopoteza ni nusu ya kiasi kilichoripotiwa.

Hayo ndio maisha mengine ya Rooney, maisha ya anasa yanayoshika kasi sasa kuliko kiwango chake uwanjani. Ingawa bado anaonekana kupenda kucheza soka na ile hali ya ushindani inaonekana pindi anapovaa jezi ya United.

Hata hivyo, ikiangaliwa kwa upande wa takwimu; Rooney ameporomoka vibaya mno, si yule wa 2011 aliyetajwa kwenye kikosi bora cha FIFPro sambamba na mastaa, Lionel Messi na Cristiano Ronaldo.

Mabao yamekauka miguuni mwake. Zaidi ya maji yanavyokauka katikati ya mitaa ya Sinza!

Msimu wa 2011/12 aliingia kwenye kikosi hicho bora akiwa na mabao 27 ya ligi, huku Messi akiwa na 50, Ronaldo (46). Msimu uliofuata, Rooney akashuka hadi 12, Ronaldo (34) na Messi (46).

Msimu wa 2013/14, Rooney alipanda kidogo hadi 17, huku Messi akiporomoka na kufunga mabao 28 na Ronaldo (31). Msimu uliofuata Rooney akashuka tena na kufunga 12, Ronaldo akimpiku tena Messi kwa kufunga mabao 48 kwa 43.

Msimu uliopita pamoja na huu, Rooney amefunga jumla ya mabao 13 tu, huku Ronaldo na Messi wakiweka kambani jumla ya mabao 118!

Hizo ni za mabao tu, lakini hata dakika za kucheza uwanjani Rooney’ ameachwa mbali na mastaa hao, hana mchango wowote ndani ya kikosi cha United na hata timu ya taifa ya England hatahitajika tena.

Ni ukweli usiopingika, huu ni mwisho wa enzi kwa Rooney, hakuna dalili za kuuona uwezo wa hali ya juu wa Rooney ndani ya Bara la Ulaya. China? Labda.