Niliondoka Real Madrid kwa sababu ya Florentino Pérez - Ronaldo

MWANASOKA Cristiano Ronaldo amesema kubadilika kwa uhusiano wake na rais wa klabu ya Real Madrid, Florentino Pérez, kulimfanya aachane na klabu hiyo aliyong’ara kwa miaka ipatayo tisa.

Ronaldo, aliyejiunga na klabu ya Juventus kwa dau la Euro mil. 100 mnamo Julai, aliondoka katika klabu hiyo akiwa ndiye mfungaji bora zaidi na ambapo katika mahojiano na shirika la France Football alisema msimamo wa Pérez kuhusiana na yeye ulikuwa umebadilika.

“Niliondoka katika klabu hiyo, hususan kwa sababu ya rais, kwani walikuwa hawanioni wa thamani kama walivyokuwa wakati najiunga nao,” alisema Ronaldo na kuongeza:

“Miaka minne ya mwanzo nilikuwa najihisi kweli kuwa ‘Cristiano Ronaldo’. Lakini baadaye rais akaanza kunitazama kwa macho ambayo hayakusema kama yalivyokuwa mwanzoni, kama vile nilikuwa sina thamani tena kwao.

“Hicho ndicho kilinifanya nifikirie kuondoka. Kuna wakati nilikuwa nasoma hata habari ambapo walikuwa wananitaka niondoke. Ukweli ni kwamba rais hakutaka niwepo pale… Ingekuwa ni suala la fedha, ningekwenda China ambako ningepata fedha mara tano ya zile ninazopata Juventus au nilizokuwa napata Real. Sikuja Juve kwa ajili ya fedha. Nilipata fedha kama hizo huko Madrid, kama si zaidi. Tofauti ni kwamba Juve walikuwa wananitaka kwa dhati. Waliniambia hivyo kwa uwazi.

“Ukweli ni kwamba rais alikuwa ananitaka, lakini wakati huohuo alinionyesha kwamba kuondoka kwangu hakuwezi kuwa tatizo.

Alipoulizwa iwapo kuondoka kwa kocha Zinedine Zidane aliyeiletea klabu hiyo ushindi mara tatu mfululizo wa Kombe la Ulaya ndicho kulichochea kuondoka kwake, Ronaldo alisema:

“Kuondoka kwangu hakukutokana na kuondoka kwa kocha huyo, bali kulikuwa moja ya mambo madogo yaliyochochea uamuzi huo kuhusiana na hali ya klabu hiyo.”

Mchezaji huyo mwenye umri wa miaka 33, alifunga mabao 44 msimu uliopita na tayari amefunga saba tangu ajiunge na Juventus na anategemea pia kupata tena ushindi wa mchezaji bora duniani — Ballon d’Or — kwa mwaka wa tatu mfululizo.

Wakati huohuo, Ronaldo anakabiliwa na kesi ya madai ya kumbaka mwanamke Mmarekani aitwaye Kathryn Mayorga (34) huko Marekani mwaka 2009.

Mayorga anadai alibakwa na Ronaldo katika hoteli moja huko Las Vegas ambapo baadaye alimpa Dola 375,000 ili akae kimya.