Nafurahi sana kwa timu yetu kupata ushindi huu muhimu - Waziri Jr

Mshambuliaji wa Timu ya Soka ya Taifa (Taifa Stars), Waziri Junior, amesema amefurahi kuanza vizuri katika mchezo wake wa kwanza wa mashindano na timu hiyo, ambapo iliibuka na ushindi wa bao 1-0.

Waziri Jr alifunga bao pekee katika mechi hiyo na kuifanya Stars ifikishe pointi sita na kupaa hadi nafasi ya pili kwenye Kundi E katika mbio za kusaka tiketi ya kushiriki fainali za Kombe la Dunia.

Nyota huyo wa KMC alifunga bao dakika ya tano baada ya kupokea pasi 'ya upendo' kutoka kwa Mudathir Yahya, aliyempokonya mpira kiungo wa Zambia kabla ya kutoa pasi kwa mfungaji.

Baada ya mechi hiyo kumalizikia, Waziri Jr alisema anaamini mwanzo huo mzuri ni ishara njema kwake katika kuitumikia taifa.

"Nafurahi sana kwa timu yetu kupata ushindi huu muhimu, kwangu ni mwanzo mzuri kwa sababu huu ndio mchezo wangu wa kwanza wa kimashindano nikiwa katika kikosi cha Taifa Stars, nashukuru kwa mwanzo huu mzuri," alisema Waziri.

Aliongeza ushindi huo wa ugenini utawaongezea morali kuelekea michezo mingine iliyobakia kabla ya kujua hatima yao.

Morocco yenye pointi sita sawa na Taifa Stars ndio vinara wa Kundi E wakati Niger wanashika nafasi ya tatu kwa kubaki na pointi zao tatu sawa na Zambia wakati DRC ni ya tano na Eritrea inaburuza mkia katika kundi hilo.