Mo Salah atashiriki michuano ya Kombe la Dunia Urusi

Mshambuliaji wa Misri na Liverpool Mohamed Salah ataweza kushiriki katika michuano ya kombe la dunia, imetangazwa na taifa lake.

Daktari wa timu ya taifa hilo amesema kuwa matibabu yake hayatachukua zaidi ya wiki tatu, huku taifa lake likitarajiwa kucheza mechi yake ya kwanza dhidi ya Uruguay mnamo tarehe 15 mwezi Juni.

Salah, 25, alikutana na daktari huyo pamoja na rais wa shirikisho la soka nchini Misri, Hany Abu Rida nchini Uhispania siku ya Jumatano.

Shirikisho hilo baadaye lilichapisha ujumbe kwenye Twitter uliosema: Baada ya kukutana na Abu Rida pamoja na daktari wa timu ya taifa nchini Uhispania leo, Shirikisho la soka linathibitisha kuwa Salah atashiriki katika kombe la dunia, Mungu akipenda.

Awali mshambuliaji huyo hakuwa katika hali ya kuweza kuzungumza zaidi na wanahabari wakati alipowasili nchini Uhispania kwa matibabu ya bega lake.

Mshamuliaji huyo aliyevunja rekodi za ufungaji wa mabao katika klabu yake ya Liverpool alipata jeraha katika mechi ya fainali ya Ligi ya Mabingwa iliyomalizika kwa timu yake kuchapwa mabao 3-1 na Real Madrid wiki moja iliopita.

Sergio Ramos akimchezea visivyo Mo Salah

Salah alipata jeraha hilo alipokuwa aking'ang'ania mpira na beki wa Real Madrid Sergio Ramos.

Alilazimika kutolewa huku kukiwa na hofu kuwa anaweza akashindwa kuichezea Misri katika fainali za kombe la dunia nchini Urusi mwezi ujao.

Shirikisho la soka nchini Misri FA lilithibitisha siku ya Jumatatu kwamba Salah ataelekea Valencia kwa matibabu ambapo ataandamana na maafisa wa matibabu wa klabu ya Liverpool.

Salah aliwasili mjini humo siku ya Jumanne alfajiri ambapo mwanahabari mmoja wa Uhispania alijaribu kutafuta majibu kuhusu hali yake, na iwapo ataweza kusafiri kuelekea Urusi na iwapo anamlaumu Ramos kwa jeraha hilo.