Djuma: Sitaweza kuwatumia Niyonzima na Okwi hadi watakapokuwa tayari

Okwi raia wa Uganda ndiye kinara wa mabao katika ligi kuu akiwa na mabao nane hadi sasa huku akifuatiwa na Habib Haji wa Mbao FC mwenye mabao saba.

Hata hivyo, tayari Niyonzima raia wa Rwanda ameshaanza mazoezi mepesi ya kujiweka sawa.

Kwa mujibu wa taarifa ya Gazeti la Championi, Djuma alisema ; “Simba haina wachezaji wawili na siyo kutokuwepo kwa Niyonzima na Okwi ndiyo kulikosababisha kutolewa mapema Mapinduzi, timu ina wachezaji wengi wenye uwezo na hata uongozi unajua.”

“Sitaweza kuwatumia Niyonzima na Okwi hadi watakapokuwa tayari kucheza kwa kuwa fiti na kwa sasa bao hawapo fiti, wakiwa vizuri watacheza na kukisaidia kikosi.

“Simba ina wachezaji wengi wazuri, hivyo naamini waliokuwepo watafanya vizuri ndiyo maana uongozi ulisajili wachezaji wengi, hao watatusaudia katika mechi zetu,” alisema Djuma ambaye alikuwa kocha na mchezaji wa zamani wa Rayon Sports ya Rwanda.

Wakati Niyonzima akiichezea Simba kwa mara ya kwanza msimu huu akitokea Yanga alikomaliza mkataba, Okwi yeye anaichezea timu hiyo kwa mara ya tatu baada ya kusajiliwa mara mbili huko nyuma.

Baada ya kutolewa katika Kombe la Mapinduzi, Alhamisi ijayo Simba itacheza na Singida United mechi ya ligi kuu jijini Dar es Salaam.